चित्रकलाको उन्नयनका लागि नेपाल आर्ट काउन्सिल

काठमाडौँ ।
कलाको उत्थान गर्ने उद्देश्यले विसं २०१९ मा स्थापित नेपाल आर्ट काउन्सिलको कक्ष कलाकारले आफूहरुले सिर्जना गरेको चित्र, मूर्ति तथा काष्ठकला जनसमक्ष ल्याउने प्रमुख थलोका रुपमा विकास हुँदै गइरहेको छ । राष्ट्रप्रमुखको हैसियतले स्थापनाको दिनमा कला परिषद्को संरक्षकको जिम्मेवारी तत्कालीन राजा महेन्द्रले लिनुभएको थियो ।

कूल २८ हजार ४२३ वर्ग फिटमा फैलिएको कला परिषद्मा चारैतिर आकर्षक कक्ष छन् भने वर्षभरि नै कुनै न कुनै कला, चित्र तथा काष्ठकला तथा चित्र कोरिरहेका कलाकारले भरिएका हुन्छन् । अहिले पनि बंगलादेशको चित्रबाट एउटा कोठा सजिएको छ । प्रारम्भका दिन वरिष्ठ कलाकार लैनसिंह बांगदेलले नेतृत्व गर्दै आएको सो परिषद्मा हाल शताब्दी पुरुष सत्यमोहन जोशीले नेतृत्व दिइरहनुभएको छ ।

कलाकारले आफ्नो सिर्जना प्रस्तुत गर्ने प्लेटफर्मका रुपमा रहेको कला परिषद्मा आफ्नो कला प्रदर्शनी गर्न आयोजकले एक फल्याटको दैनिक रु पाँच हजार शुल्क तिर्नुपर्छ । रासससँग कुरा गर्दै नेपाल कला परिषद्का वरिष्ठ अधिकारी गोकुल थापाले कला परिषद्मा वर्षभरि नै स्वदेशी तथा विदेशी कला प्रदर्शनी हुने गरिएको जानकारी दिनुभयो ।

त्यहाँ कला प्रदर्शनका लागि आउने स्वदेशी तथा विदेशी आयोजकलाई समान शुल्क लिने गरिएको छ । तर एकल चित्रकला प्रदर्शनी गर्ने तथा आर्थिकरुपमा कमजोर भएका आयोजकलाई १५ प्रतिशत छुट दिने व्यवस्था रहेको थापाले बताउनुभयो ।

वरिष्ठ कलाकार लैनसिंह बांगदेल, तत्कालीन शिक्षामन्त्री कीर्तिनिधि विष्ट, मृगेन्द्र शमशेर राणा, नाटककार बालकृष्ण सम, पूर्वराजदूत यदुनाथ खनालको सामूहिक प्रयासबाट शुरु भएको नेपाल कला परिषद्मा हाल पाँच जना कर्मचारी कार्यरत छन् । निजी क्षेत्रबाट सञ्चालन हुँदै आएका कारण सरकारी बजेटको व्यवस्था नरहेको र कला प्रदर्शनीबाट उठेको रकमबाट उक्त परिषद् सञ्चालन भइआएको छ ।

नेपालमा चित्रकला प्रदर्शनीको विकास नभइसकेको स्थापनाको दिनमा जर्मन, फ्रान्स आदि मुलुकका चित्र ल्याएर प्रदर्शनी गरेर नेपालमा चित्रकला प्रदर्शनीको विकास गरिएको थापाले बताउनुभयो ।

वरिष्ठ चित्रकार हरि खड्काले ४० वर्ष लामो चित्रकलाको यात्रामा आफूले धार्मिक, नेपाली जनजीवन तथा हिमाल, पहाडजस्ता चित्र कोरेको बताउनुभयो । ती चित्रबाट रु एक लाखसम्ममा कृति बिक्री हुने गरेको जानकारी दिनुभयो ।

उहाँले वरिष्ठ चित्रकार प्रेममान चित्रकारले धार्मिक तथा परम्परागत चित्र कोर्ने गर्नुभएको र उहाँको योगदान अतुलनीय रहेको उल्लेख गर्नुभयो । समाजमा जागरण ल्याउने क्षेत्र कला नै भएकाले राज्य तथा समाजका विभिन्न वर्गको सामूहिक प्रयास भए मात्र कलासँगै देशको पनि विकास हुने उहाँको धारणा छ । न्युजट्वान्टीफोर


advertisements

.
Just In KhabarSite
© all rights reserved
Crafted with by NetKUTI