पुर्ब प्रधानमन्त्री किर्तिनिधि बिस्टको निधन, राजकीय सम्मानबिनै अन्त्येष्टि

काठमाडौं– पूर्वप्रधानमन्त्री कीर्तिनिधि विष्टको राजकीय सम्मान बिनै अन्त्येष्टि गरिएको छ ।  लामो समयदेखि क्यान्सर रोगबाट पीडित विष्टको ज्ञानेश्वरस्थित आफ्नै निवासमा  शनिबार विहान निधन भएको थियो ।

पूर्वप्रधानमन्त्री जस्तो  विशिष्ट व्यक्तिको निधनमा  राजकीय सम्मानका साथ अन्त्येष्टि गर्ने प्रचलन रहिआएको भएपनि उनको परिवारले साधारण ढंगले  अन्त्ेष्टि गरेको हो । परिवारकै चाहनामा  राजकीय सम्मान बिनै अन्त्ेष्टि  गरिएको बताइएको छ ।  उनको पार्थिव शरीरलाई पशुपति आर्यघाटस्थित साझा चितामा जलाइएको थियो ।

 

उनले लखनउ विश्वविद्यालयबाट राजनीति शास्त्रमा स्नातकोत्तर गरेका थिए ।

राजनीतिसम्बन्धी लेखहरू लेख्दै राजनीतिज्ञ डिल्लीरमण रेग्मीसँगको सङ्गतबाट राजनीतिमा सरिक भएका बिष्टले नेपाली राष्ट्रिय काँग्रेसबाट राजनीतिक यात्रा शुरु गरेका थिए । उनी जहानियाँ राणा शासनविरुद्धको विसं २००७ को क्रान्तिमा सक्रियतापूर्वक लागेका थिए ।

 

विसं २००७ मा प्रजातन्त्र पुनःस्थापनापछि गठित राष्ट्रिय जनता परिषद्को उपसभापति र सभापति पनि रहेका साथै सोही पार्टीबाट उनी विसं २०१५ फागुन गते भएको काठमाडौँ–३ मा प्रतिनिधिसभाका लागि उम्मेदवार बनेका थिए ।

उनले तत्कालिन वाग्मती पुनःरुत्थान कोष, वीरेन्द्र गद्दी आरोहण नागरिक मूल समारोह समिति, त्रिभुवन स्मारक समिति र राष्ट्रिय सम्मान समितिका अध्यक्षको जिम्मेवारी पनि निर्वाह गरेका थिए ।

उनको राजनीतिक दर्शनको अध्ययन र पत्रकारितामा रुचि थियो ।

उनको  दुई छोरा र तीन छोरी छन् । दुई वर्ष अघि उनको श्रीमती र एक छोराको निधन भएको थियो ।

उनको अन्तिम बिदाईका लागि  उपप्रधानमन्त्री कमलथापासहित पञ्चायत पृष्ठभूमिका  नेता तथा शुभेच्छुक पशुपति आर्यघाट पुगेका थिए ।


advertisements
Just In KhabarSite
© all rights reserved
Crafted with by NetKUTI